The Truth Will Make You Free
கல்லறையும் கேட்கும்!
நற்செய்தி: யோவான் 5:28.
28. இதைக்குறித்து நீங்கள் ஆச்சரியப்படவேண்டாம்; ஏனென்றால் பிரேதக்குழிகளிலுள்ள அனைவரும் அவருடைய சத்தத்தைக் கேட்குங் காலம் வரும்;
நல்வழி:
கல்லறைக்கும் காது உண்டு;
கடவுட்சொல் அது கேட்கும்.
நல்லவர்க்கும் வாழ்வுண்டு.
நம்பிக்கையே நமை மீட்கும்.
சில்லறைக்கும் துரு உண்டு.
சீர்வாக்குச் சான்று தரும்.
இல்லையென்றால் எது உண்டு?
இரண்டுமுறை சாவு வரும்!
ஆமென்.
-கெர்சோம் செல்லையா.
இறுதித் தீர்ப்பு!
நற்செய்தி: யோவான் 5:26-27.
நல்வழி:
களையெடுக்கும் கடைசி நேரம்,
கண் முன்னில் தெரிகிறது.
விளைவெடுக்கும் முன்பதுவும்,
வெளியிடத்தில் எரிகிறது.
முளை தளிர்க்கும் மறைவாக்கும்,
முழு வடிவில் விரிகிறது.
தளை முறிக்கும் இறையருளும்,
தண்டனையில் புரிகிறது!
ஆமென்.
-கெர்சோம் செல்லையா.
இறையொலி!
நற்செய்தி : யோவான்: 5:25.
நல்வழி:
பிறந்தோர் உள்ளில் இறையின் பாட்டு,
பிரியா அன்பால் ஒலிக்கட்டுமே.
இறந்தோர் நெஞ்சும் இதனைக் கேட்டு,
இயேசு அருளால் விழிக்கட்டுமே.
மறந்தோர் என்னும் நாமும் இன்று,
மறு பிறப்பாகிச் சொலிக்கட்டுமே.
சிறந்தோர் சூழ, வரும் மகன் அன்று,
சிறுமை யாவும் ஒழிக்கட்டுமே!
ஆமென்.
-கெர்சோம் செல்லையா.
நற்செய்தி: யோவான் 5:23-24.
எவ்வழி நல்வழி என்றறியாது,
எழுந்து நடவா மனிதருக்கு,
செவ்வழி உன்வழி என்றறிவித்து,
செயலில் நடத்தும் இறை மகனே,
இவ்வழி தவிர வேறிலையென்று,
இனிதே செல்லும் புனிதருக்கு,
அவ்வழி சொல்லும் வாழ்வடைய,
அன்பு ஊற்றி, நிறை மகனே!
-ஆமென்.
-கெர்சோம் செல்லையா.
விண்ணின் தீர்ப்பு!
நற்செய்தி: யோவான் 5:22
நல்வழி:
தினை விதைத்து தினை அறுப்பார்,
தேய்ந்துபோகும் இந்நாட்டில்,
வினை புதைத்து தனை மறுப்பார்,
விளைச்சலாலே மகிழ்வாரோ?
பனை மரம் போல் பயன் தருவார்,
பரிசுவாங்கும் அந்நாளில்,
எனை இணைத்த இறை மகனார்
எழுது தீர்ப்பில் மகிழ்வாரே!
ஆமென்.
-கெர்சோம் செல்லையா.
உயிராம் இறை!
நற்செய்தி: யோவான் 5:21
நல்வழி:
கடலின் அழகு கரையாகும்;
காண விரும்பின் கடப்பரே.
உடலின் அழகு உயிராகும்;
உயிர் இருப்பின் நடப்பரே.
திடமும் நீரும் காற்றாகும்,
தெளியார் இருளில் கிடப்பரே.
தடந்தராமல் உயிர் போகும்,
தட்டியெழுப்புவார் மீட்பரே!
ஆமென்.
-கெர்சோம் செல்லையா.
இறையைக் காட்டும் இறைமைந்தன்!
நற்செய்தி: யோவான் 5:19-20.
19. அப்பொழுது இயேசு அவர்களை நோக்கி: மெய்யாகவே மெய்யாகவே நான் உங்களுக்குச் சொல்லுகிறேன்: பிதாவானவர் செய்யக் குமாரன் காண்கிறதெதுவோ, அதையேயன்றி, வேறொன்றையும் தாமாய்ச் செய்யமாட்டார்; அவர் எவைகளைச் செய்கிறாரோ, அவைகளைக் குமாரனும் அந்தப்படியே செய்கிறார்.
20. பிதாவானவர் குமாரனிடத்தில் அன்பாயிருந்து, தாம் செய்கிறவைகளையெல்லாம் அவருக்குக் காண்பிக்கிறார்; நீங்கள் ஆச்சரியப்படத்தக்கதாக இவைகளைப் பார்க்கிலும் பெரிதான கிரியைகளையும் அவருக்குக் காண்பிப்பார்.
நல்வழி:
பெற்றோர் பார்த்து பிள்ளை கற்பார்.
பெருமை கொண்டு அதனுள் நிற்பார்.
மற்றோர் மதித்து, நன்மை செய்வார்,
மக்களும் உணர, அவரும் உய்வார்.
கற்றோர் இன்று அறவழி மறந்தார்;
காதால் கேளா பிள்ளையும் துறந்தார்.
பற்றோர் எப்படி இறையறிவுறுவார்?
பார்க்கும் ஏசுமகனே தருவார்!
ஆமென்.
-கெர்சோம் செல்லையா.
மைந்தன் இயேசு!
நற்செய்தி: யோவான் 5:17-18. 17.
இயேசு அவர்களை நோக்கி: என் பிதா இதுவரைக்கும் கிரியைசெய்துவருகிறார், நானும் கிரியைசெய்துவருகிறேன் என்றார்.18. அவர் ஓய்வுநாள் கட்டளையை மீறினதுமல்லாமல், தேவனைத் தம்முடைய சொந்தப் பிதா என்றுஞ்சொல்லித் தம்மை தேவனுக்குச் சமமாக்கினபடியினாலே, யூதர்கள் அவரைக் கொலைசெய்யும்படி அதிகமாய் வகைதேடினார்கள்.
நல்வழி:
தந்தையென்று இறை அழைத்து,
தனயனாக மொழி உரைத்தார்.
மந்தையாடாய் நமை நினைத்து,
மேய்ப்பனாயும் வழி அமைத்தார்.
சொந்தமாக்கி எடுத்தணைத்து,
சொற்படியே பழி துடைத்தார்.
இந்தயேசு கிறித்துவேதான்,
என்னிலும் விழி திறந்தார்!
ஆமென்.
-கெர்சோம் செல்லையா.
ஏன் இந்தத் துன்பம்?
நற்செய்தி: யோவான் 5:14-16.
நல்வழி:
ஐந்து விண்மீன் அறையெடுத்து,
ஆடிப் பாடிக் குரல் கொடுத்து,
இந்த நாளில் நாம் நடித்தால்,
இறைப்பணி அல்ல, நண்பர்களே.
அந்த நாளில் கிறித்துவிற்கு,
அவரது அடியர் அனைவருக்கு,
வந்த துன்பம் ஏன் எதற்கு?
வாய்மையில் வெல்ல, அன்பர்களே!
ஆமென்.
-கெர்சோம் செல்லையா.
விளம்பரமற்ற தொண்டு!
நற்செய்தி: யோவான் 5:11-13.
நல்வழி:
நன்மைச் செய்த மனிதர் எவரும்,
நன்றிக் கடனை நாடுகையில்,
தன்னை மறைத்துத் தனியே செல்லும்
தன்னலமற்ற தலைவன் யார்?
இன்னாள் இதனை எண்ணும் எவரும்,
இயேசு பாதை தேடுகையில்,
சொன்னால் வியப்பாகும் வகையில்,
சொரிவாருள்ளில், தாழ்மை பார்!
ஆமென்.
-கெர்சோம் செல்லையா.