The Truth Will Make You Free
திருந்துதலே விருந்து!
கிறித்துவின் வாக்கு: லூக்கா 24:30-31.
கிறித்துவில் வாழ்வு:
விருந்தினரென்று வீட்டில் வந்து,
விருந்தளிப்பவர் இயேசு.
இருந்துமில்லா கண்கள் திறந்து,
இறைவன் முன்பு பேசு.
வருந்திச்சேர்த்தும் பயன் தராது,
வாழ்வளியா காசு.
திருந்துதல்தான் விருந்து இன்று;
தேவையற்றவை வீசு!
ஆமென்.
-கெர்சோம் செல்லையா.
பின்னால் நிற்கும் இயேசுவுக்கே!
கிறித்துவின் வாக்கு: லூக்கா 24:28-29.
கிறித்துவில் வாழ்வு:
முன்பின் தெரியார் என்றாலும்,
முகம் அறியார் வந்தாலும்,
அன்பாய் ஏற்று அமுதளிக்கும்,
அரிய பண்பைக் கொண்டோமா?
இன்னாள் இப்படி நாம் செய்யும்,
எல்லா நன்மை உதவிகளும்,
பின்னால் நிற்கும் இயேசுவுக்காம்;
பிறரில் இறையைக் கண்டோமா?
ஆமென்.
-கெர்சோம் செல்லையா.
முன்னர் உரைத்தது நடந்திருந்தும்….
கிறித்துவின் வாக்கு: லூக்கா 24:25:-27.
கிறித்துவில் வாழ்வு:
முன்னே அறிவோர் உரைத்திருந்தும்,
மோசே தொடங்கி வரைத்திருந்தும்,
பின்னே பலரெதிர் பார்த்திருந்தும்,
பேதமை அடியரில் அகலலையே.
சொன்னது போன்றே நடந்திருந்தும்,
சொற்படி உயிர்த்தவர் உடனிருந்தும்,
என்னில மக்களை மீட்டெடுக்கும்,
இறையறிவின்னும் புகலலையே!
ஆமென்.
-கெர்சோம் செல்லையா.
நம்பவில்லை!
கிறித்துவின் வாக்கு: லூக்கா 24:22-24.
கிறித்துவில் வாழ்வு:
பெண்கள் வாக்கும் கேட்பதில்லை;
பெரியோர் அறிவும் ஏற்பதில்லை.
கண்கள் இருந்தும் திறப்பதில்லை.
காரிருள் நெஞ்சும் சிறப்பதில்லை.
நண்பா, நம்மிலும் இந்த நிலை.
நம்ப மறுக்கும் மந்த நிலை.
பண்பால் சிறப்பது எந்த நிலை?
பற்றெனப் பற்றும் அந்த நிலை!
ஆமென்.
-கெர்சோம் செல்லையா.
முடிவாய் வருகிற உயிர்ப்பு!
கிறித்துவின் வாக்கு: லூக்கா 24:17-21.
கிறித்துவில் வாழ்வு:
அடியார் என்று பெயர் பெற்றும்,
அறியாமையும் தொடர்கிறது.
படியார் பாரார்; அது வரைக்கும்,
பாவப் பண்பும் படர்கிறது.
துடியாய்த் துடித்து இறந்திருந்தும்,
தூயனுயிர்ப்பும் தெரிகிறது.
முடிவாய் வருவது உயிர்ப்பாகும்;
முக்காலமும் புரிகிறது!
ஆமென்.
-கெர்சோம் செல்லையா.
நெஞ்சில் காண்போம்!
கிறித்துவின் வாக்கு: லூக்கா 24:13-16.
கிறித்துவில் வாழ்வு:
நன்றாய் வேண்டல் செய்கின்றோம்;
நல்லிறை நூலும் கற்கின்றோம்.
சென்றார் வந்தார் நினையாமல்,
செய்தியுரைத்தும் நிற்கின்றோம்.
என்றாலும் நாம் குறைகின்றோம்.
எங்கெல்லாமோ பார்க்கின்றோம்.
நின்றாள்கின்ற இறைமகனை,
நெஞ்சில்கண்டு ஆர்ப்பரிப்போம்!
ஆமென்.
-கெர்சோம் செல்லையா.
கிறித்துவில் வாழ்வு:
மும்முறை மறுத்த பேதுரு இன்று,
முதல்வனாய் அறிய ஓடுகின்றார்.
இம்முறை கேட்பது சரியோயென்று,
இயேசுவின் உடலைத் தேடுகின்றார்.
செம்மறை காட்டும் சீலைகள் கண்டு.
சிந்தை நடுங்கவே ஆடுகின்றார்.
தம்மிடம் இருக்கும் ஐயம் கொண்டு,
தயக்கமுற்றவர் வாடுகின்றார்!
ஆமென்.
-கெர்சோம் செல்லையா.
கிறித்துவின் வாக்கு: லூக்கா 24:8-11.
கிறித்துவில் வாழ்வு:
பித்தென எண்ணிப் பிதற்றல் என்றது,
பிரறல்ல, இயேசுவின் பிள்ளைகளே.
ஒத்துக் கொள்ள அவரை வைத்தது
உயிர்த்த இயேசுவின் கல்லறையே.
செத்தவர் உயிர்த்து எழும்பி வருவது,
செரிக்க இயலா வல்லமையே.
எத்தனையோ பேர் இதனைக் கண்டு,
இயேசுவை நம்புதல் நல்லருளே!
ஆமென்.
-கெர்சோம் செல்லையா.
நினைவுகூருங்கள்!
கிறித்துவின் வாக்கு: லூக்கா 24:7
கிறித்துவில் வாழ்வு:
முன்பே உரைத்த இறைவாக்கு,
முழுதும் நிகழ்வது நீ கண்டு,
இன்றே இயேசுவை ஏற்றுக்கொள்;
இனிய வாழ்வு உனக்குண்டு.
அன்பே நமக்கு வழியென்று,
ஆண்டவர் சொல்வது நீ கேட்டு,
நன்றே உன்னைத் திருத்திக்கொள்.
நன்மை தரவே இப்பாட்டு!
-ஆமென்.
-கெர்சோம் செல்லையா.
இயேசுவின் உயிர்ப்பு!
கிறித்துவின் வாக்கு: லூக்கா 24:5-6.
கிறித்துவில் வாழ்வு:
இறந்தவர் கிடக்கிற கூட்டத்திலே,
எழுந்தவர் என்பவர் ஒருவரில்லை.
பிறந்தவர் முடிக்கிற தோட்டத்திலே,
பின்னர் நிகழ்வதும் தெரிவதில்லை.
சிறந்தவர் இயேசு எழுகையிலே,
சிதறின பழமை எண்ணங்களே.
திறந்தவர் அவரைத் தொழுகையிலே,
தெரியுது உயிர்ப்பின் வண்ணங்களே!
ஆமென்.