The Truth Will Make You Free
இயேசுவே வழி!
இறை வாக்கு: யோவான் 14:6.
இறை வாழ்வு:
வழி எது? வாய்மை எது?
வாழ்பவரின் உயிர் எது?
தெளிவிலாது நானிருந்தேன்.
தெரியார் வாழ்வில் தீது.
மொழி எது, மேன்மை எது?
மெய்யின்பம் இங்கு எது?
அழியா அன்பென்றார் ஏசு;
அது ஒன்றே இறை தூது!
ஆமென்.
-கெர்சோம் செல்லையா.
ஐயம் அகற்றுதல்!
இறைவாக்கு: யோவான் 14: 4-5.
இறை வாழ்வு:
ஐயம் அகற்றுதல் அடியருக்கழகு.
அதையே தோமா செய்கிறார்.
பொய்யறியாத இயேசுவினிடத்து,
புரிந்து கொள்ளவே கேட்கிறார்.
செய்வது அறிந்தவரிடத்துப் பழகு.
செய்யும் நன்மையில் உய்கிறார்.
மெய்யெது பொய்யெது பிரித்தறிந்து,
மெய் நாடின், இறை மீட்கிறார்!
ஆமென்.
-கெர்சோம் செல்லையா.
எனக்கும் ஓரிடம் தாரும்!
இறைவாக்கு: யோவான் 14:3.
3. நான் போய் உங்களுக்காக ஸ்தலத்தை ஆயத்தம்பண்ணினபின்பு, நான் இருக்கிற இடத்திலே நீங்களும் இருக்கும்படி, நான் மறுபடியும் வந்து உங்களை என்னிடத்தில் சேர்த்துக்கொள்ளுவேன்.
எனக்கும் ஓரிடம் உம்மிடம் தாரும்.
இப்படிக் கேட்கத் தகுதி இல்லை.
நினைக்கும் உள்ளில் இன்றே வாரும்;
நெஞ்சே கோயில் வேறில்லை.
மணக்கும் உம் திரு வாக்கும் கூறும்;
மனதின் அழுக்கும் குறைவில்லை.
பிணத்தைச் சுமந்து நடக்கிறேன் பாரும்;
பிழை போகாவிடில் பேறில்லை!
ஆமென்.
-கெர்சோம் செல்லையா.
விண் வீடு!
இறை வாக்கு: யோவான் 14: 2.
இறை வாழ்வு:
என் வீடு இங்கு நிலைத்தது இல்லை;
எனினும் இறையுடனே இருப்பேன்.
விண் வீடு மனிதர் செய்ததும் இல்லை;
விரும்பி ஈகிறார், பார்த்திருப்பேன்.
நன் வீடு புகு நாள் முன்னறிவில்லை;
நம்பிக்கையிலே நான் இருப்பேன்.
கண் மூடு காட்சி, கவலையும் இல்லை;
கடவுளின் பேறு, காத்திருப்பேன்!
ஆமென்.
-கெர்சோம் செல்லையா.
கலங்காதிரு நெஞ்சே!
இறை வாக்கு: யோவான் 14:1.
இறை வாழ்வு:
அச்சமும் ஐயமும் அகத்தின் நோய்கள்,
ஆண்டவர் இருக்க ஏன் கொண்டாய்?
எச்சமாய் இவைகள் இருப்பதினாலே,
எண்ணிலடங்காத் தீங்குண்டாய்.
பச்சிலை மரத்தில் கனிகள் பிறக்க,
பாயும் கீழடி வேர் பெறுவாய்.
உச்சியின் மேலே வாழ்வு சிறக்க,
உண்மைப்பற்று உள்ளுறுவாய்!
ஆமென்.
-கெர்சோம் செல்லையா.
உதவாதிருந்தேனே!
இன்னும் அன்பாய் நன்மைகளீந்து
எளியருக்குதவாதுதறினேனே;
என்னும் எண்ணம் பன்முறை வந்து,
என்னை அழுத்தப் பதறினேனே.
பின்னால் தொடரும் தீதால் அழியும்,
பிறவியைத் திருத்தக் கதறினேனே.
முன்னால் நின்று, அருளைப் பொழியும்,
மும்மையாரால் இனி உதவுவேனே!
-கெர்சோம் செல்லையா.
உணர்ச்சிப் பேச்சு!
இறை வாக்கு: யோவான் 13:36-38.
இறை வாழ்வு;
உணர்ச்சி பொங்கப் பேசும் வாக்கு
உயிர் தரும் ஆவியர் வாக்காமோ?
கணத்தில் தன்னை மறந்த நாக்கு,
கடவுள் மகிழ்கிற நாக்காமோ?
மனத்தை அடக்கி வாழாப் போக்கு,
மன்னர் விரும்பும் போக்காமோ?
நினைத்து வாழ்வோர் நிலையும் நோக்கு,
நிலைவாழ்வு நல் நோக்காமே!
ஆமென்.
-கெர்சோம் செல்லையா.
எது ஆன்மிகம்?
ஏழைக்கிரங்குதல் ஆன்மீகம்.
எவரையும் ஏற்கும் ஆன்மீகம்.
வாளைத் துறப்பதும் ஆன்மீகம்.
வாழ வைப்பதும் ஆன்மீகம்.
தாழ்மையின் உருவம் ஆன்மீகம்;
தன்னலம் இழப்பதும் ஆன்மீகம்.
கோழைத்தனமா ஆன்மீகம்?
கொடாது தீமை, ஆன்மீகம்!
-கெர்சோம் செல்லையா.
அன்பு ஒன்றே வழி!
முன்னொரு காலத்து மூடம் இல்லை;
முடிவு கட்ட நீ கேளு.
இனொரு பிறவி என்பதும் இல்லை;
இதையுமறிந்து, வாழு.
பன்வகை வழிகள் சேர்ப்பதும் இல்லை;
பரன் வழி அன்பை நாடு.
சொன்னவர் இயேசு, பிழையே இல்லை;
சொந்தமாக்கு, இறை வீடு!
-கெர்சோம் செல்லையா.
இறை வாக்கும் இறையன்பும்!
இறை வாக்கு: யோவான் 13:34-35.
இறையன்பு:
இறையடியானெனச் சொல்கிற என்னில்
இறை அன்புண்டோ, அளக்கிறேன்.
குறை நிறைவாக அளக்கும் முன்னில்,
கொடுமை செய்து பிளக்கிறேன்.
உறையிலொளிக்கும் கத்தியை உருக்கும்;
உள்ளன்பில்லை, வெறுக்கிறேன்.
அறைய வேண்டாம், அன்பைப் பெருக்கும்;
அழிக்கும் வெறுப்பை நொறுக்கிறேன்!
ஆமென்.
-கெர்சோம் செல்லையா.