The Truth Will Make You Free
எது வரலாறு?
வேங்கையும் மான்களும் எழுத மறுக்க,
வேடர் வரைவதே வரலாறு.
தூங்கிடும் மனிதர் எழும்பாதிருக்க,
தொடர்ந்து உரைப்பர் அவதூறு.
ஏங்கிடும் உள்ளம் எங்குதான் உண்டு,
என்று இறங்குதே மறையாறு.
வாங்கிடும் அடியர் வழங்கும் தொண்டு,
வரலாறென்று இனி கூறு!
-கெர்சோம் செல்லையா.
கிறித்துவை யாரென அறிய விரும்பின்,
கொலோசை கடிதம் வாசிப்போம்.
திருத்திடும் தெய்வம் யாரெனக் கண்டு,
தீமை அகற்றிட யோசிப்போம்.
நரித்தன வாழ்க்கை நமக்கினி வேண்டாம்.
நேர்மையாயிருக்க யாசிப்போம்.
ஒருத்தொருக்கொருவர் உதவியாயிருந்து,
உண்மை இறையை நேசிப்போம்!
(கொலோசையர்)
இன்புறு வேளையில் இயல்பாய் வருவது,
யாவர் உள்ளிலும் மகிழ்ச்சி.
துன்புறு நேரமும் தெய்வத்திலிருந்தால்,
தெரியும் உண்மை மகிழ்ச்சி.
அன்புடையார்க்கு அனைத்து பொழுதும்,
ஆண்டவர் தருவார் மகிழ்ச்சி.
பின்பிது உணர்த்த, பவுலார் வரைந்தார்,
பிலிப்பிய கடிதம் மகிழ்ச்சி!
(பிலிப்பியர்).
இவரெல்லாம் எம்கோவில் ஊழியர்;
இதனால் பெருமை கொள்கிறோம்.
அவரது பெயரைப் புகழ்ந்துரைத்து,
அவர்போல் உழைக்கச் சொல்கிறோம்.
பவுலைத் தொடர்ந்து பலபேர் உழைத்த,
பழைய எபேசைத் தேடினோம்.
எவரது வாழ்வில் அன்பு இலையோ,
இழப்பது கண்டு, வாடினோம்!
(திருத்தூதர் பணிகள் 19 & 20,
எபேசியருக்கு எழுதிய திருமுகம்,
திருவெளிப்பாடு 2;1-7).
தோலை வெட்டும் சடங்கு செய்தாலே,
தெய்வ மீட்பு வருமென்று,
வேலை வெட்டி இல்லார் உரைத்தார்;
விழுந்த கலாத்தியர் பதைத்தார்.
வாலை நிமிர்த்தச் சடங்குகள் வேண்டாம்;
வாழும் பற்றே தருமென்று,
நூலை எழுதிப் பவுல் எச்சரித்தார்,
நெறிப் பிழையும் புதைத்தார்!
(கலாத்தியர்)
நான்கு தடவை கடிதம் எழுதி,
நன்கு செய்தி நவின்றிட்டும்,
ஈங்கு மறையில் இரண்டேயுண்டு,
இதையாவது நாம் கற்போம்.
தூங்கு மனிதர் உயிரோடெழும்பும்,
தெய்வப் புதிரையும் இனி கற்று,
ஏங்குவாரைத் தேறச் செய்வோம்;
இறை வாக்கில் நாம் நிற்போம்!
(1 கொரிந்தியர் 15).
விரிந்து பரந்த நிலம் அற்றிருந்தும்,
வெற்றிக்கு ஓட்டம் நடந்தது.
கொரிந்து சிறந்த துறை பெற்றிருந்தும்,
கூடா அழுக்கிலே கிடந்தது.
எரிந்து ஒழிந்து போவோரிருந்தும்,
இறையின் இரக்கம் தெரிந்தது.
புரிந்து பவுலார் ஊழியம் செய்தார்;
புனித வாழ்வும் பிறந்தது!
(திருத்தூதர் பணிகள் 18:1-18)
பகரைன் NEC திருக்கோவிலில் பெற்ற,
இறை வாக்குறுதி:
ஏசாயா 59:21.
ஈர் இருபத்தொன்று ஆண்டுகள் முன்னே,
இறையகம் நோக்கி ஒருவன் வந்தான்.
ஓரமாய் தனது உடமையை வைத்து,
உள்ளில் திருமண ஆசி கேட்டான்.
தூரமாய் வருவதும் அறிந்த இறையோ,
தொடரும் பின்னடியார்க்குந் தந்தான்.
கோரிய விண்ணப்பம் ஒன்றே ஆயினும்,
கொடுக்கும்படி பல கோடி இட்டான்!
(இன்று 43-ஆம் ஆண்டின் மணநாள்!)
பற்றால் மீட்பு பெற்றவர் இனிமேல்,
பழைய தீவினை வெறுக்கட்டும்.
பெற்றோம் உரிமம் என நினையாமல்,
பிழைகள் தவிர்க்க, நொறுக்கட்டும்.
வற்றாவூற்றாய் வடியும் வகையில்,
வளரும் நேர்மை பிறக்கட்டும்.
கற்றோம் என்கிற இறுமாப்பின்றி,
கயமை யாவும் துறக்கட்டும்!
(உரோமர் 6)
எழுபத்தி ஆறு பிறக்கிறது!
எழுபத்தி ஐந்து ஆண்டுகள் முடித்து,
இன்னொரு நாளும் காணுகிறேன்.
இழுப்பார் விருப்பை நானும் எடுத்து,
இயங்கியதால் வழி கோணுகிறேன்.
பழுத்தவன் எனினும், பழியும் பிடித்து,
படைத்தவர் முன்பு நாணுகிறேன்.
அழைக்கும் இயேசு, நீட்டிக் கொடுத்து,
ஆளுவதால், அன்பு பூணுகிறேன்!
-கெர்சோம் செல்லையா.