திரு அவைத் தலைவர், மூப்பர் தேர்வில்,

தெரிகிறது இன்று கழிவு.

ஒருவரைப் பழிக்க விரும்பா மார்பில்

உரைக்கிறேன், இது இழிவு.

பெரு மூச்சோடு திமொதைக் கற்றால்,

பெறுவோம்  அருட் பொழிவு. 

வரு முன் அறிந்து திரு அவை பெற்றால், 

வராது என்றும் அழிவு!

(1 திமொத்தேயு 2 & 3 ).

காசிற்காகத்  திருப்பணிச் செய்யும் 

கயமை வருவதை முன் கண்டு, 

பேசிக்கிறவர் நாண வரைந்தார்;

பின்பும் இதை யார் கேட்டார்?

வாசிக்கிறவர் திமொதைப் பயின்றால்,

வளர்வார் இறை மனிதரென்று,

நேசிக்கிற உம் நெஞ்சிற்குரைப்பேன்; 

நேர்மையில்லார் கெட்டார்! 

(1 திமொத்தேயு 6 : 6-21).

எடுத்த ஈவுகள் வைத்துக் கொண்டு,

இறை புகழ் பாடி நிறுத்தாமல்,

அடுத்த தலைமுறை வளர்க்கும் தொண்டு,

அருட்திரு பவுலார் புரிகிறார்.

தொடுத்து ஊழியக் கதவுகள் திறந்து, 

திருமண உறவால் வருத்தாமல், 

தடுத்து நிறுத்தாப் பற்றினில் பிறந்து,

தாழும் திமொதியே தெரிகிறார்!

(திருத்தூதர் பணிகள் 16:1-3; 19:21-22

1 & 2 திமொத்தேயு).

இனி வரும் காலம் இறையின் காலம்.

என்ன நடக்கும் அறியாக் காலம்.

மனித அறிவிலே தெரியாக் காலம்;

மைந்தனரசு வருகிறக் காலம்.

புனித பவுலார் அனுப்பிடும் கடிதம், 

புத்துலகை விளக்கும் கடிதம். 

தனியோரவைக்கு அனுப்பியக் கடிதம். 

தரணிக்கோ தெசலோனிக்கக் கடிதம்! 

(1 & 2 தெசலோனிக்கர்).

எது வரலாறு?

வேங்கையும் மான்களும் எழுத மறுக்க, 

வேடர் வரைவது வரலாறு. 

நீங்களும் நானும் மௌனமாய் இருக்க, 

நேர்மையை ஓட்டும் அவதூறு.

ஏங்கிடும் உள்ளம் எவ்விடம் உண்டு, 

என்று இறங்கும் மறை ஆறு.

வாங்கிடும் அடியர் வழங்கும் தொண்டு, 

வரலாறுரைக்க, நீ கூறு!

-கெர்சோம் செல்லையா. 

கிறித்துவை யாரென அறிய விரும்பின்,

கொலோசை கடிதம் வாசிப்போம்.

திருத்திடும் தெய்வம் யாரெனக் கண்டு,

தீமை அகற்றிட  யோசிப்போம்.

நரித்தன வாழ்க்கை நமக்கினி வேண்டாம். 

நேர்மையாயிருக்க யாசிப்போம்.

ஒருத்தொருக்கொருவர் உதவியாயிருந்து, 

உண்மை இறையை நேசிப்போம்!

(கொலோசையர்)

இன்புறு வேளையில் இயல்பாய் வருவது,

யாவர் உள்ளிலும் மகிழ்ச்சி. 

துன்புறு நேரமும் தெய்வத்திலிருந்தால்,

தெரியும் உண்மை மகிழ்ச்சி.

அன்புடையார்க்கு அனைத்து பொழுதும், 

ஆண்டவர் தருவார் மகிழ்ச்சி. 

பின்பிது உணர்த்த, பவுலார் வரைந்தார்,

பிலிப்பிய கடிதம் மகிழ்ச்சி!

(பிலிப்பியர்).

இவரெல்லாம் எம்கோவில் ஊழியர்;

இதனால் பெருமை கொள்கிறோம்.

அவரது பெயரைப் புகழ்ந்துரைத்து, 

அவர்போல் உழைக்கச் சொல்கிறோம். 

பவுலைத் தொடர்ந்து பலபேர் உழைத்த, 

பழைய எபேசைத் தேடினோம்.

எவரது வாழ்வில் அன்பு இலையோ,

இழப்பது கண்டு, வாடினோம்!

(திருத்தூதர் பணிகள் 19 & 20, 

எபேசியருக்கு எழுதிய திருமுகம்,

திருவெளிப்பாடு 2;1-7).

தோலை வெட்டும் சடங்கு செய்தாலே,

தெய்வ மீட்பு வருமென்று,

வேலை வெட்டி இல்லார் உரைத்தார்;

விழுந்த கலாத்தியர் பதைத்தார்.

வாலை நிமிர்த்தச் சடங்குகள் வேண்டாம்;

வாழும் பற்றே தருமென்று, 

நூலை எழுதிப் பவுல் எச்சரித்தார், 

நெறிப் பிழையும் புதைத்தார்!

(கலாத்தியர்)

நான்கு தடவை கடிதம் எழுதி, 

நன்கு செய்தி நவின்றிட்டும்,

ஈங்கு மறையில் இரண்டேயுண்டு,

இதையாவது நாம் கற்போம். 

தூங்கு மனிதர் உயிரோடெழும்பும்,

தெய்வப் புதிரையும் இனி கற்று, 

ஏங்குவாரைத் தேறச் செய்வோம்; 

இறை வாக்கில் நாம் நிற்போம்!

(1 கொரிந்தியர் 15).